ಶೇಗುಣಸಿಯಲ್ಲಿ ಸಾವಯವ ಲೋಕ

September 30, 2018

ಜೈ ಶೇಗುಣಸಿ...

ಸಣ್ಣ ಪ್ರಮಾಣದಲ್ಲಿ ಬೇಸಾಯ ಮಾಡುವವರು ಸಾವಯವ ಕೃಷಿಯಲ್ಲಿ ಯಶಸ್ವಿಯಾಗಬಹುದು. ಆದರೆ ತುಂಬ ದೊಡ್ಡ ಪ್ರಮಾಣದಲ್ಲಿ ಸಂಪೂರ್ಣವಾಗಿ ಸಾವಯವಮಯವಾಗಲು ಸಾಧ್ಯವೇ ಎಂಬ ಪ್ರಶ್ನೆಗೆ ಉತ್ತರ ಬೇಕಿದ್ದರೆ ನೀವು ಬೆಳಗಾವಿ ಜಿಲ್ಲೆಯ ಅಥಣಿ ತಾಲೂಕಿನ ಶೇಗುಣಸಿ ಗ್ರಾಮದಲ್ಲಿರುವ ಕಲ್ಮೇಶ್ವರ ಫಾರ್ಮ ಹೌಸ್‌ಗೆ ಭೇಟಿ ನೀಡಬೇಕು.
ಅಲ್ಲಿ ಯಲಡಗಿ ಮತ್ತು ಭದ್ರಪ್ಪಗೋಳ ಕುಟುಂಬದ ಸದಸ್ಯರಾದ ಕಲ್ಮೇಶ ಯಲಡಗಿ ನೇತೃತ್ವದಲ್ಲಿ ನಡೆಯುವ ಕೃಷಿ ಚಟುವಟಿಕೆಗಳನ್ನು ನೋಡಬೇಕು. ಉತ್ತರ ತನ್ನಿಂತಾನೇ ಸಿಗುತ್ತದೆ.

ಅವರು ಕೃಷ್ಣಾ ನದಿ ತೀರದಲ್ಲಿರುವ 32 ಎಕರೆ ಎರೆಭೂಮಿಯಲ್ಲಿ ಕಲ್ಮೇಶ್ವರ ಫಾರ್ಮ ಹೌಸ್‌ನ ಆಶ್ರಯದಲ್ಲಿ ಭರ್ತಿ ಕೇವಲ ಸಾವಯವ ಗೊಬ್ಬರ ಮತ್ತು ಸಾವಯವ ಔಷಧವನ್ನು ಮಾತ್ರ ಬಳಸಿ ಕೃಷಿ ಮಾಡುತ್ತಾರೆ. ಸ್ವತಃ ಎರೆಗೊಬ್ಬರ, ದಶಪರ್ಣಿ, ಪಂಚಗವ್ಯ ಮತ್ತು ಔಷಧಗಳಾದ ಹಸಿಮೆಣಸಿಕಾಯಿ ಕಷಾಯ, ಎರೆಜಲ, ಜೀವ ಸಾರ, ಹೀಗೆ ಸಾವಯವ ಗೊಬ್ಬರ, ಔಷಧ ತಯಾರಿಸಿ ತಮ್ಮ ಸ್ವಂತ ಭೂಮಿಗೆ ಉಪಯೋಗಿಸಿ ಮಿಕ್ಕಿದ್ದನ್ನು ಬೇರೆ ರೈತರಿಗೆ ಮಾರಾಟ ಮಾಡುತ್ತಾರೆ. ಇದು ಸಂಸ್ಥೆಗೆ ಲಾಭವನ್ನೂ ತಂದುಕೊಡುತ್ತಿದೆ.

ಒಟ್ಟು 25 ಬರಡು ದನಗಳು ಹಾಗೂ ಗೀರ್, ಜವಾರಿ, ಖಿಲಾರಿಯಂಥ ವಿಶೇಷ ತಳಿಯ ಆಕಳುಗಳನ್ನು ಸಾಕಿ, ಅವುಗಳ ಸೆಗಣಿಯಿಂದ ಕಾಂಪೋಸ್ಟ್ ಗೊಬ್ಬರವನ್ನು ತಯಾರಿಸುವುದು ಇಲ್ಲಿನ ವಿಶೇಷ. ರೈತ ಕಲ್ಮೇಶ್ ಅವರು ಸಂಪೂರ್ಣ ಜೀವಸತ್ವ ನೀಡುವ ಈ ಕಾಂಪೋಸ್ಟ್ ಗೊಬ್ಬರವನ್ನು ಮಾರಾಟ ಮಾಡುವುದಿಲ್ಲ. ಅದನ್ನು ಸಂಪೂರ್ಣವಾಗಿ ತಮ್ಮ ಹೊಲಕ್ಕೆ ಬಳಸುತ್ತಾರೆ. ಇದರಲ್ಲಿ ಸಾರಜನಕ, ರಂಜಕ, ಪೊಟ್ಯಾಷ್ ಸಮೃದ್ಧವಾಗಿದ್ದು, ಸಮೃದ್ಧ ಸಾವಯವ ಗೊಬ್ಬರವಿದು ಎನ್ನುತ್ತಾರೆ ಕಲ್ಮೇಶ್.

ಸಾವ ಯವ ಗೊಬ್ಬರ ಬಳಸಿದರೂ ಇವರು ಬೆಳೆಯುವ ಕಬ್ಬು, ಗೋಧಿ, ಸೊಯಾಬಿನ್, ಜೋಳ, ಜವೆ ಗೋಧಿ ಸಮೃದ್ಧವಾದ ಇಳುವರಿ ನೀಡುತ್ತದೆ. ಹೀಗಾಗಿ ಗ್ರಾಮದ ಎಲ್ಲ ಕೃಷಿಕರೂ ಈ ಪದ್ಧತಿಯತ್ತ ಆಕರ್ಷಿತರಾಗುತ್ತಿದ್ದಾರೆ. ಅದಕ್ಕೆ ಪೂರಕವಾಗಿ ರೈತರೂ ಸ್ಪಂದಿಸುತ್ತಿದ್ದು ಅವರಿಗೆ ಕಲ್ಮೇಶ್ ಮಾರ್ಗದರ್ಶನ ನೀಡುತ್ತಾರೆ.ಇದೀಗ ಅಥಣಿ ತಾಲೂಕಿನ ಶೇಗುಣಸಿ ಗ್ರಾಮವನ್ನು ‘ಸಾವಯವ ಕೃಷಿ ಕಾಶಿ’ಯಾಗಿ ಮಾಡಲು ಶ್ರಮಿಸುತ್ತಿರುವ ಕೃಷಿಕ ಕಲ್ಮೇಶ್ ದೂ.ಸಂ.9448264480.

ಸಾವಯವ ಬೆಲ್ಲ: ಸಾವಯವ ಪದ್ಧತಿಯಲ್ಲಿ ತಾವು ಬೆಳೆದ ಕಬ್ಬಿನಿಂದ ಸಾವಯವ ಬೆಲ್ಲ ತಯಾರಿಸುವುದು ಕಲ್ಮೇಶ್ವರ ಫಾರಂನ ವಿಶೇಷತೆಗಳಲ್ಲೊಂದು. ಸರಕಾರದಿಂದ ಸಾವಯವ ಉತ್ಪನ್ನ ಮಾರಾಟ ಮಾಡಲು ಪರವಾನಿಗೆಯನ್ನೂ ಇವರು ಪಡೆದಿದ್ದಾರೆ. ಸಾವಯವ ಬೆಲ್ಲ ಮತ್ತು ಇನ್ನಿತರ ಸಾವಯವ ಪದಾರ್ಥಗಳನ್ನು ಬೆಂಗಳೂರು, ಶಿವಮೊಗ್ಗ, ಬೆಳಗಾವಿಗಳಲ್ಲದೆ ಚೆನ್ನೈನ ಕೆಲವು ಸಾವಯವ ಮಳಿಗೆಗಳಿಗೂ ಇವರು ಪೂರೈಸುತ್ತಾರೆ.